賴皮也牛，很張。

烏貓姊講予你聽

https://youtu.be/jOHwABDfzDM

第一張田蛤仔相片

第二張田蛤仔相片

透早的大波池足媠--ê

5:30am天猶未光就來走標

姊妹仔嘛來搝筋

兩老--ê 袂記得紮水，in兩个轉去提，卻無提鎖匙，只好作樑上君子

阮上愛的大波池

騎兩光的跤踏車來去圖書館

來池上，一定愛來這間豆皮店

 ​​

哪會知影~早頓嘛有豆皮

池上的暗時足有氣氛--ê

佇都蘭衝湧，足爽--ê

雙生仔衝湧衝了足忝--ê

暗頓食

197食食店，竟然佇阮睏過的廟寺邊仔

海豬仔𤆬頭自動整理睏房，in真實大漢啊

逐年攏愛去𨑨迌，上國中了後in時間足絚，連歇熱嘛是，只肯請一工綴阮出去耍，閣一定愛去池上，阿妹仔講：我欲轉去看看咧！

前年阮佮阿君規家伙仔去花蓮蹽溪仔，佇溪底藏水沬、跳水攏足歡喜。這擺欲閣來耍水，想欲夠兩个閣愛去山線，干焦有三工爾爾，時間有夠短ê啦，拄好看著阿孜紹介都蘭衝湧ê好教練，雖然一个佇山邊，一个佇海墘，毋過為著in兩个，阿爸較遠嘛ka駛過。

月底賴--ê愛去參加一个鐵人比賽，佇池上彼工就來練習5公里ê走標佮騎車。本來掠準干焦兩老--ê，無想著姊妹仔嘛欲去~透早五點就愛起床，普通時攏睏共七晏八晏才起床，這時陣竟然講欲看池上ê日出放棄睏眠ê時間，實在予人足驚惶--ê。

一年攏愛轉來這个東部山邊的鄉鎮~因為佇二年仔歇熱ê時捌tshuā in來遮半作工課半𨑨迌，彼當陣只是想欲予姊妹仔有一个較長ê時間感受庄跤的生活------感受開門就是田；感受厝內有田蛤仔；感受閣看著狗仔會食虼蚻；體會寄蹛別人兜ê無方便、和人客接觸的鋩角佮逐工愛作工課了後才會使出去耍等等。我想攏是足深的記持。

隔轉工就衝去都蘭準備拜日欲衝湧，仝款透早共行李款款咧，苦茶油抹規身軀，面閣加強，衝湧ê衫仔褲穿予好勢，海，阮來矣。頭家娘看著阮ê穿插，講我傷保護，我想伊的意思是講我傷超過------我戴兩頂帽仔掛喙罨，喵佮ti穿長褲。規个海沙埔無人親像阮按呢，輸人毋輸陣，輸陣歹看面，油甲抹落去，褲甲褪落去，驚啥物？

「wagaligong」ê馬可教練足有系統咧教毋但教衝湧嘛閣講佇海底自保kah大海的智識，伊是外國人，講英語佮華語，上課足心適，外文無足好嘛攏聽有，連無愛上課ê ti嘛聽甲足趣味。阮兜兩个足厲害，衝幾若擺，兩老--ê攏佇海底做洗衫機閣予衝湧枋挵規若擺，挵甲頭眩目暗，有夠落漆--ê；海豬仔親像伊ê名，佇海面頂嘛~不哩啊自在。

轉來ê時，姊妹仔攏講這擺是in歇熱上好的收煞。我佮賴--ê嘛足歡喜，大人有運動著，囡仔嘛有體會無仝款的活動，台灣實在有足濟物件阮猶未行踏佮𨑨迌，予人足期待後一擺的起行。

最後想欲提供一个出外歇睏看冊free的好所在：圖書館。佇池上抑是出外，阮足愛去圖書館借冊，台東辦好借冊的卡，後擺紮身份證佇台東縣十六个鄉鎮攏會使借佮還冊。我這擺佇池上、東河佮成功借，A借B還，足方便矣，毋過嘛是池上的冊上新上濟，冷氣閣足四序矣。